Србија полека, но сигурно се збогува со Европа

Пишува: Ели Јурукова, дописник на БГНЕС од Белград

Српскиот претседател Александар Вучиќ направи очекувано неочекуван потег – го назначи за вицепремиер својот најверен политички сателит Александар Вулин.

Очекуван потег бидејќи Вулин е неговиот близок политички полутрон. Неочекувано – затоа што Вулин е на американската листа со сериозни обвиненија за шверц на оружје, трговија со дрога, но и помош за руските акции за дестабилизација на безбедноста на Балканот. Креаторот на т.н „Српски свет“ и до неодамна шеф на српското разузнавање, Александар Вулин, се враќа на политичката сцена за инает на САД и Европа. Руската еуфорија на Вулин и покажаната љубов кон Путин и Вучиќ е политички транспарентен потег. Вулин, од една страна, во Москва е прогласен за „рускиот човек“ во Србија, сега повторно е со висока државна функција. Од друга страна, за суетниот Вучиќ, тирадите на Вулин дека Вучиќ е „единствениот слободен државник во Европа“ мора да звучат како мелем на рана.

САД не го кријат разочарувањето од фактот што во составот на новата српска влада се вклучени две лица од „црната листа“ на Стејт департментот. Вучиќ го назначи контроверзниот Ненад Поповиќ – исто така близок до Русија – за министер без ресор. Дали е ова еден вид бунт на Александар Вучиќ против Брисел и Вашингтон по очекуваното прифаќање на Косово во Советот на Европа и подготвената резолуција за геноцидот во Сребреница во ОН?

Не треба да се заборави дека Вучиќ сака да си игра со оган, но сето тоа е за домашна политичка употреба. Тој мора да го задржи својот имиџ на единствен човек во Србија кој може да му се спротивстави на целиот свет – лекција што Русија ја научи добро. Но, Вулин, без разлика на високата политичка функција, сигурно е минорен играч без меѓународно влијание, кој седи во својата канцеларија и им кажува на Србите за своите комунистички политички идеи од минатиот век.

Србите одамна се збогуваа со руската еуфорија. Младите Срби секојдневно ја напуштаат Србија без повратен билет. Да бидеме оптимисти. Тешко дека Србија ќе се затвори во руската школка и ќе стане жртва на хистеричната пропаганда на Москва. Србија е зрела за промени. Ако Вучиќ се збогува со Европа, тие ќе дојдат многу брзо.