Тажна вест! Почина легендарниот бугарски музичар Кирил Маричков
Почина легендарниот бугарски музичар Кирил Маричков, јавува БГНЕС.
Трагедијата се случила во село Селановци, каде Кирил Маричков имал концерт со „Фондацијата“ во село Враца. За време на излегувањето на сцената паднал.
На местото на настанот била повикана брза помош. Музичарот имал тешка повреда на мозокот. Тој починал во возилото на Брза помош. Поради инцидентот концертот е откажан.
Кирил Маричков е роден на 30 октомври 1944 година. Тој е пејач, музичар и композитор, најпознат по неговата работа во рок бендот Штурците.
Маричков е потомок на истакнатиот бугарски револуционер и политичар Георги Странски, внук на истакнатиот архитект Киро Маричков, а по линија на неговата мајка – на диригентот Борис Левиев. Неговиот татко Кирил Кирилов Маричков студирал право и дипломатија прво на Сорбона во Париз, а потоа во Лозана. Бил прв амбасадор на Бугарија во Ватикан по 1989 година. Неговата мајка Ирина Левиева е уметник.
Првите чекори на Маричков во музичката област беа рок-формацијата „Бандараците“. Таму свиреше бас гитара, а во 1967 година, по растурањето на бендот Бандараците, Маричков и тапанарот Петар Цанков го основаат бендот Штурците.
Во 2010 година е одликуван со Орденот „Св. Кирил и Методиј“ прв степен за неговите особено големи заслуги во областа на културата и уметноста. Во 2020 година ја добива и највисоката државна награда – Орден „Стара Планина“ – 1 степен.
