(Видео) 150 изгубени години: Бугарија и Македонија заедно против Коридорот 8
Илјадници идеи, политики, планови, буџети, предлози, проекти и лаги. Безброј влади во Скопје и Софија и никаков резултат веќе 150 години. Истите земјени патишта по кои минувале Гоце Делчев и Даме Груев. За ова раскажува краткиот филм на агенцијата БГНЕС „Бугарија и Македонија заедно против Коридорот 8“.
Главната задача на Коридорот е поврзувањето на Јадранското со Црното Море. Тој треба да стигне до италијанските пристаништа Бари и Бриндизи преку Албанија, Северна Македонија и бугарските градови Бургас и Варна. Коридорот комбинира автопат, железнички линии и друга придружна инфраструктура. Меѓу Софија и Скопје недостасуваат сите три компоненти, а на веќе изграденото му треба целосна санација. На железничката пруга во Ѓуешево има повеќе мачки скитници отколку возови. Вратите на станицата се заклучени, таа повеќе личи на сет за снимање на историски филм.
„Историјата на железничката линија Софија-Ќустендил-Скопје е постара од историјата на Третата бугарска држава“, вели историчарот доц. д-р Ангел Џонев.
Бугарија е членка на Европската Унија и НАТО. Нејзината економија е поголема од економиите на Србија и Северна Македонија заедно. Софија дозволува сурови подбивања од Белград и од просрпските политичари во Скопје како Христијан Мицкоски и Александар Николоски. Бугарија со своето неработење во последните години заостанува во геополитичката игра на Балканот. Режимот на Александар Вучиќ дури се фали дека го елиминирал Коридорот 8 во корист на Коридорот 10 – во правец север-југ. Тука интервенира и историскиот српски сојузник – Грција.
„Ние сме заинтересирани и за развој на вертикалната инфраструктура, но сепак мора да се развива Коридорот 8. Солунското пристаниште беше провинциско, а сега ги има сите шанси да добие исклучително економско значење. Она што ќе го направиме е наша работа“, вели Стефан Стојанов, поранешен амбасадор на Бугарија во Грција во периодот 2002-2006 г.
Бугарија стои со скрстени раце и пропушта историска шанса. Транспортните врски се непроценливи не само за билатералните односи, туку и за односите меѓу луѓето. Во исто време, Тирана создава транспортен прстен со сите соседни земји, каде што живее компактно албанско малцинство, а Грција останува лидер на Балканот во транспортната инфраструктура.
Поминаа изгубени децении, во кои беа пропуштени можностите за вистинско зближување со Македонија. Нема повеќе простор за изговори. Денеска никој нема да не чека – ниту НАТО, ниту Европската Унија, ниту противниците на Бугарија.
Вицеадмиралот о.з. Пламен Манушев го поставува прашањето: „Како ќе се одвива логистиката за борбената група на НАТО во Бугарија без транспортна врска со Италија?
Коридорот 8 е клучен приоритет за Европската унија и клучен за воената мобилност на НАТО на Балканот. Уште колку децении треба да поминат пред истиот да ги поврзе Бугарија и Македонија?
