Бугарија може да одигра клучна улога во транспортното и енергетското поврзување во регионот, оценуваат поранешни американски дипломати
Бугарија има потенцијал да биде важен играч во транспортната и енергетската инфраструктура на Југоисточна Европа, изјави поранешниот помошник-државен секретар на САД, Џејмс О’Брајан, на форум организиран од Евроатлантскиот институт во Софија, јави БГНЕС.
Настанот беше посветен на војната во Украина, дезинформациските кампањи од Русија и Кина и иднината на клучните индустрии. Специјален гостин покрај О’Брајан беше и поранешниот специјален пратеник на САД Џејмс Рубин, кој предупреди дека „војната во Украина е далеку од завршена“ и дека „целата кариера на Путин зависи од војната“.
Рубин истакна дека „информациската војна“, предводена од Москва и Пекинг, е еден од најсериозните предизвици денес. Тој додаде дека е потребна координација меѓу ЕУ и САД, особено во однос на регулирањето на социјалните мрежи и воената индустрија.
О’Брајан нагласи дека квалитетот на животот на идните генерации ќе зависи од развојот на четири индустрии: вештачката интелигенција, медицината, енергетиката и дигиталните технологии – сектори во кои Бугарија веќе има квалитетни кадри, особено во ИТ-сферата.
Двајцата коментираа и за раздорот меѓу Доналд Трамп и Илон Маск. Рубин оцени дека несогласувањето би можело да има „стратешко влијание“, додека О’Брајан предупреди дека тоа може да го натера Маск да бара нови партнери надвор од САД.
