Откажан е настапот на пријателот на Путин во Италија

Организаторите на музички фестивал во Италија го откажаа концертот на рускиот диригент Валериј Гергиев по неколкудневен притисок од критичарите на Кремљ и активистите за човекови права.

Гергиев, пријател и сојузник на рускиот претседател Владимир Путин, требаше да диригира со италијански оркестар и солисти од Маринскиот театар во Санкт Петербург во поранешната кралска палата во близина на Неапол подоцна овој месец.

На 72-годишникот му е забрането да настапува на западните сцени по руската инвазија на Украина во февруари 2022 година, која тој одби да ја осуди. Италијанскиот министер за култура, Алесандро Џули, рече дека одлуката на организаторите на фестивалот Un’Estate da RE е „здрав разум“ и за заштита на „вредностите на слободниот свет“.

Украина во неделата ги повика организаторите да го откажат настапот на Гергиев, нарекувајќи го „путинов гласноговорник“ кој не треба да биде добредојден никаде „сè додека руските сили продолжуваат да вршат злосторства“.

Јулија Навални, вдовица на починатиот руски опозициски лидер Алексеј Навални, го поздрави откажувањето.

„Ниеден уметник кој ја поддржува сегашната диктатура во Русија не треба да биде добредојден во Европа“, напиша таа на Икс/Макфакс.