Романија и Полска алармираат за руски дронови, Зеленски бара построги санкции

Романија стана најновата членка на НАТО која пријави нарушување на својот воздушен простор од руски дрон на 13 септември, во време кога Полска распрати воени авиони како реакција на нови руски удари во непосредна близина на нејзината граница со Украина, јавува БГНЕС.

Украинскиот претседател Володимир Зеленски предупреди дека Москва свесно ги проширува операциите со беспилотни летала и побара Западот да одговори со построги санкции и засилено воено сојузништво.

Министерството за одбрана на Романија соопшти дека два ловци F-16 биле подигнати во воздух за да ја следат ситуацијата, откако дрон навлегол во националниот воздушен простор. Тој бил следен до моментот кога исчезнал од радарите во близина на селото Чилија Веке.

Истовремено, Полска информираше дека таа и нејзините сојузници од НАТО распоредиле авиони и хеликоптери, додека руски дронови изведувале напади врз Украина во близина на полската граница. Војската во Варшава соопшти дека противвоздушните системи се подигнати на највисоко ниво на готовност.

Полскиот премиер Доналд Туск истата вечер ја укина највисоката тревога, но предупреди: „Остануваме будни“. Полска е особено на штрек поради претходниот инцидент на 9-10 септември, кога речиси 20 руски дронови влегле во нејзиниот воздушен простор.

Зеленски нагласи дека „последните навлегувања на дронови се очигледно проширување на војната од страна на Русија“. Тој апелираше за нови санкции и колективна одбранбена стратегија: „Не чекајте десетици ‘шахеди’ и балистички ракети пред конечно да донесете одлуки“.

Франција, Германија и Шведска во меѓувреме ја зајакнаа поддршката за одбраната на полското воздушно пространство.

Американскиот претседател Доналд Трамп изјави дека е подготвен да воведе сериозни санкции против Русија, но само ако сите земји од НАТО го сторат истото и престанат да купуваат руска нафта. Тој порано сугерираше дека некои инциденти можеби се случиле по „грешка“, но полскиот премиер Туск остро го отфрли тоа тврдење.

Американскиот државен секретар Марко Рубио, пак, предупреди дека доколку се докаже дека нарушувањето на полскиот воздушен простор било намерно, тоа би било „силно ескалирачко“.

Во Москва беше потврдено дека украински дрон удрил во една од најголемите рафинерии во земјата – објект на компанијата Башнефт во градот Уфа, 1.400 километри од фронтот. Според руските власти, нападот предизвикал пожар и мали оштетувања, а украинската воена разузнавачка агенција ГУР ја презеде одговорноста.