Бугарскиот новинар Христо Грозев ја доби наградата „Европски новинар на годината“ на фестивалот Prix Europa
Бугарскиот истражувачки новинар Христо Грозев е добитник на престижната награда Европски новинар на годината на фестивалот PRIX EUROPA, што се одржа во Берлин.
Грозев, кој е познат по своите истражувања за активностите на руските разузнавачки служби и по улогата во пронаоѓањето на поранешниот менаџер на компанијата Wirecard, Јан Марсалек, изјави дека признанието е потврда за сите години труд и лични жртви.
„Ова признание ми дава одговор зошто овие единаесет години на лишувања и отсуство од семејството вредеа. Оваа награда за мене има големо значење, бидејќи покажува дека сето тоа имало смисла“, изјави Грозев за Бугарското национално радио (БНР).
На фестивалот PRIX EUROPA беа доделени 13 награди за најдобрите европски аудио, видео и дигитални медиумски продукции. Вкупно беа номинирани 162 програми од 30 држави.
Меѓу номинираните беше и аудио-серијата на БНР „Јас“, а на церемонијата беше објавено и приклучувањето на Бугарското национално радио кон Алијансата PRIX EUROPA. Генералниот директор на јавниот сервис, Милен Митев, ја врачи наградата во категоријата Audio Documentary.
Свечената церемонија се одржа во Градското собрание на Берлин, во присуство на бројни медиумски професионалци од цела Европа.
