Две нови бугарски неделни училишта отворени во Бесарабија

Во текот на изминатиот викенд беа свечено отворени две нови бугарски неделни училишта при Бугарско-украинскиот центар „Медиа“ во селата Нагорно (Измаилски регион) и Бановка (Болградски регион), финансирани согласно Одлуката на Владата на Бугарија бр. 90, јавува БТА.

На настаните присуствуваа генералниот конзул на Бугарија во Одеса Светослав Иванов и првиот секретар Стојан Стојанов. Во училиштето во Нагорно ќе учат 75 деца, додека во Бановка се отворија подготвителна група и четири одделенија од прво до четврто одделение.

Во своето обраќање Иванов ја истакна поддршката на Бугарија кон Украина и значењето на бугарските неделни училишта за зачувување на јазикот, културата и националниот идентитет на бугарската заедница во Украина. Тој информира дека во учебната 2025/2026 година во Украина ќе функционираат 49 бугарски неделни училишта.

Празничните активности продолжија во селото Калчево, каде беше одбележан почетокот на новата учебна година во локалното бугарско неделно училиште и детската градинка при Центарот „Медиа“.

Претседателката на Центарот, Екатерина Гержик, изјави дека наставата во сите 11 филијали започнала на 4 октомври, а свеченостите по повод првото ѕвонење се одржале на 11 октомври. Таа им се заблагодари на бугарското Министерство за образование и наука и на бугарските дипломати за поддршката, нагласувајќи дека Центарот ќе продолжи со развој на нови образовни проекти за дијаспората.

Бугарско-украинскиот културно-образовен центар „Медиа“ е основан во 2017 година и девет години успешно реализира образовна дејност во Украина. Од 2021 година е дел од мрежата на бугарските неделни училишта во странство. Центарот има 11 филијали во Одеса, Киев, Лавов и во бугарските села во Болградскиот и Измаилскиот регион, каде учениците изучуваат бугарски јазик и литература, историја, географија, како и вокал, хорeографија и уметничко творештво.