Стотици во тишина им оддадоа почит на жртвите од пожарот во Кран-Монтана

Стотици луѓе се собраа во тишина во студената ноќ во Кран-Монтана за да положат цвеќиња и да запалат свеќи во спомен на загинатите и повредените во ужасниот пожар, додека го славеле дочекот на Новата година, јавува БГНЕС.

Околу 40 лица загинаа, а повеќе од 100 беа повредени во пожарот што избувна во преполниот бар „Le Constellation“ околу 1:30 часот наутро на 1 јануари.

Атмосферата меѓу оние што дојдоа да им оддадат почит на жртвите беше траурно тивка. Многумина од присутните, кои стоеја неподвижно и го гледаа местото на трагедијата, познаваат луѓе кои сè уште се водат како исчезнати или се тешко повредени, пренесе АФП.

Луѓето зборуваа шепотејќи, ако воопшто зборуваа. Единствениот звук доаѓаше од генераторот што работеше покрај привремените бели шатори поставени пред барот.

„Јас не бев таму, но имав многу пријатели и роднини кои беа. Некои загинаа, други се во болница. Околу 10. Повеќето се пријатели на моите родители, но јас многу добро ги познавам“, изјави еден млад човек кој дојде да оддаде почит и се претстави со презимето Оростевич.

Тој рече дека купил цвеќе за да го положи „како мал знак на почит“. „Нека почиваат во мир“, додаде Оростевич.