Бугарската амбасада и Форумот на словенските култури со заеднички новогодишен прием во Љубљана

Амбасадата на Бугарија во Словенија и Форумот на словенските култури (ФСК) беа кодомаќини на новогодишен прием на 8 јануари 2026 година во Љубљана, јавува БТА.

Гостите ги поздравија амбасадорот Красимир Божанов и директорката на ФСК, д-р Андреја Рихтер. „Бугарскиот амбасадор ја истакна успешната соработка со форумот и изрази надеж дека партнерството ќе продолжи да се развива и во 2026 година“, соопштија од амбасадата.

Андреја Рихтер се заблагодари за кодомаќинството и ги претстави клучните иницијативи на ФСК за промоција на словенската култура и наследство. Меѓу нив беа одбележани 20 години од проектот „100 словенски романи“, во кој од 2023 година Бугарија е застапена со романот „Четврток“ од Здравка Евтимова, како и проектот „Slawa – словенски автори кон светот“. Посебно внимание беше посветено и на наградите „Жива“, доделени и на музеи од Русе, Габрово и Шумен, како и на соработката со УНЕСКО центарот во Софија.

Културната програма беше збогатена со настап на бугарската виолинистка Тамара Бакарџиева, членка на Симфонискиот оркестар на Националната опера и балет во Марибор, која изведе дела од Георги Златев-Черкин, Марин Големинов и Петар Христосков.

На приемот присуствуваа дипломати од словенските земји, претставници на културни и образовни институции, како и партнери на ФСК, со што настанот уште еднаш ја потврди важноста на културната соработка меѓу словенските држави.