Фестивал на мартинката во Брисел ги обедини Бугарија, Романија и Молдавија

За четврта година по ред во Брисел се одржа „Фестивал на мартинката“ со учество на Бугарија, Романија и Молдавија, а годинава домаќин беше Романија. Настанот се одржа на 22 февруари во „Мермерната сала“ на Слободниот универзитет во Брисел, јавува БНР.

Бугарската културна асоцијација во Белгија повторно беше партнер и претстави рачно изработени плетени украси со пролетна тематика, како и фолклорна програма.

„Од пладне пеевме, свиревме, танцувавме и ги претставувавме традициите на сите држави“, изјави претседателката Тања Станева, додавајќи дека следната година Бугарија ќе биде домаќин на фестивалот.

Децата од фолклорната формација „Ха тропнете“ од Антверпен изведоа бугарски народни танци, а ученици од БНУ „Ран Босилек“ во Брисел ги претставија ликовите Пижо и Пенда и легендата за мартинката.

Како и секоја година, се одржаа работилници за изработка на мартинки, каде децата учеа за симболиката на белата и црвената нишка. Организаторите нагласија дека зачувувањето на традицијата е особено важно за децата родени во странство и од мешани семејства.