Двајца млади Бугари ќе учествуваат во програма на германскиот Бундестаг

Лора Врбанова од Бургас и Константин Праматаров од Варна на 2 март заминуваат во Берлин како учесници во Меѓународната парламентарна стипендија (IPS) на Германскиот Бундестаг, јавува БНР. Програмата им овозможува неколкумесечен престој и практична работа во тимовите на германски пратеници, учество во семинари и директно запознавање со законодавниот процес. Во неа учествуваат млади високообразовани лица од повеќе од 40 држави.

Константин дознал за програмата од пријатели и ја истакнува нејзината меѓународна димензија:
„Ме импресионира можноста да се сретнам со луѓе од целиот свет и истовремено да научам повеќе за законодавниот процес во Германија и како се врши власта во држава во срцето на Европа.“

Тој очекува да ги продлабочи знаењата за поделбата на власта и политичкиот консензус.

Лора за стипендијата дознала преку социјалните мрежи на германската амбасада:
„Сакам да запознаам луѓе од различни култури и да разберам како функционира германскиот парламент, како се донесуваат одлуки и како се постигнува консензус меѓу партии со различни ставови.“

Програмата се оценува како мост меѓу младите генерации и демократските институции и нуди и професионален и личен развој во средина на практично функционирање на демократијата.