Просечната плата во Бугарија порасна за 12,7% во почетокот на 2026 година

Просечната бруто-плата во Бугарија достигна 1.407 евра во првото тромесечје од 2026 година, што претставува раст од 12,7% на годишно ниво, покажуваат податоците на Националниот статистички институт на Бугарија. Во споредба со претходното тромесечје, платите пораснале за 2,8%, а нето-примањето при просечната плата изнесува околу 1.091 евро, јавува Капитал.

За првпат по неколку месеци, просечните плати во приватниот сектор (1.410 евра) се повисоки од оние во јавниот сектор (1.398 евра), иако на годишно ниво растот е побрз во државниот сектор – 15,3% наспроти 11,8% во приватниот.

Највисоки примања и натаму имаат вработените во ИТ и телекомуникациите со просечна плата од 3.176 евра, следени од финансискиот и осигурителниот сектор со 2.226 евра и енергетиката со 2.060 евра. Најниски остануваат платите во хотелиерството и угостителството – 870 евра.

Разликите меѓу регионите остануваат значителни. Просечната плата во Софија достигнува 1.915 евра и е речиси 47% повисока од онаа во Варна, додека најниска е во Благоевград – 968 евра.

Растот на платите се одвива во услови на засилен инфлаторен притисок поради високите цени на енергијата. Годишната инфлација во април беше ревидирана на 6,8%, при што најголем месечен раст на цените е забележан кај транспортот (9%) и облеката и обувките (7,9%).