Министерката Петрова и турскиот амбасадор Ујаник разговараа за продлабочување на билатералната соработка меѓу Софија и Анкара
Шефицата на бугарската дипломатија Велислава Петрова одржа средба со вонредниот и ополномоштен амбасадор на Република Турција во Република Бугарија Мехмет Саит Ујаник во Министерствотото за надворешни работи на Бугарија.
За време на разговорот, двајцата го потврдија одличниот дијалог, како и пријателските и добрососедски билатерални односи, при што разговараа за можностите за нивен понатамошен развој. Двете страни ќе работат на проширување на соработката во нови области, меѓу кои иновациите, дигиталната инфраструктура, како и зелените и нискојаглеродните енергетски технологии.
Министерката Петрова нагласи дека Бугарија ја разгледува Турција не само како соседна држава, туку и како сојузник во НАТО и клучен партнер во низа стратешки области. Таа ја истакна одличната соработка меѓу двете земји по теми како спротивставувањето на нелегалната миграција и заштитата на безбедноста на границата, транспортната поврзаност, енергетските испораки, трговијата, инвестициите, туризмот и одбраната.
Двајцата разговараа и за претстојните самити на шефовите на држави и влади и на министрите за надворешни работи на земјите учеснички во Процесот за соработка во Југоисточна Европа (ПСЈИЕ), со кои завршува ротациското бугарско претседателство со ПСЈИЕ.
На крајот од разговорот беше нагласено дека добрите односи меѓу Бугарија и Турција се темелат не само на заеднички иницијативи на институционално ниво, туку и на интензивни контакти и културни врски меѓу двата народа. Првиот дипломат на Бугарија и амбасадорот Ујаник изразија заедничка подготвеност односите да продолжат да се развиваат врз основа на рамноправност, взаемна почит и соработка.
