САД го определуваат Коридор 8 како стратешки проект за Западен Балкан

Соединетите Американски Држави го определуваат развојот на Коридор 8 – транспортната и енергетска врска меѓу Јадранското и Црното Море – како еден од клучните стратешки проекти во новата политика кон Западен Балкан. Ова се наведува во извештај на Стејт департментот до Конгресот, јавува БГНЕС.

Според документот, Вашингтон го менува пристапот кон регионот, ставајќи акцент на стабилноста, економските интереси и стратешкото партнерство. Западен Балкан е оценет како важен геополитички и економски простор, каде нестабилноста може да биде искористена од Русија и Кина за поткопување на западното влијание.

Стабилноста останува главен приоритет, при што САД најавуваат нови стратешки дијалози со Северна Македонија и Србија во 2026 година и продолжување на поддршката за безбедноста во регионот, вклучително и преку НАТО и мисијата КФОР во Косово.

Во економската сфера, Вашингтон планира поддршка за инфраструктурни, транспортни и енергетски проекти, со посебен фокус на Коридор 8, енергетската диверзификација и намалувањето на зависноста од Русија. Во извештајот се наведува дека транспортните и енергетските мрежи во регионот заостануваат зад европските стандарди и ја отежнуваат економската интеграција.

Документот предупредува и на ризици од „злонамерно надворешно влијание“ од Русија и Кина, како и на заканите од организираниот криминал, поради што САД ќе продолжат да инвестираат во борбата против транснационалниот криминал, киберзаканите и финансиските измами.