Во Белене им беше оддадена почит на жртвите на комунистичкиот режим во Бугарија

На островот Персин кај поранешниот Втор објект на комунистичкиот логор „Белене“ во Бугарија, на 6 јуни се одржа комеморација во чест на жртвите на комунистичкиот режим под мотото „Солидарни со жртвите и нивните наследници“, јавува БТА.

Традиционално, настанот започна со обраќања и молитви од претставници на православната, католичката, муслиманската и протестантската вероисповед, во знак на почит кон различните верски заедници чии припадници биле затворени во логорот.

Специјален гостин на одбележувањето беше историчарот проф. д-р Пламен Павлов, кој истакна дека островот треба да стане „посебна територија на сеќавањето“, насочена кон иднината. За време на комеморацијата беше отворено и прашањето за иднината на поранешниот логор. Заменик-градоначалникот на Белене, Петар Ангелов, изјави дека главна цел на општината е зачувување на автентичните остатоци и изградба на меморијал посветен на жртвите, како место за поклонение и помирување.

Извршниот директор на фондацијата „Вистина и сеќавање“, Христо Христов, нагласи дека бугарската влада никогаш не ѝ наложила на Општина Белене да ги обновува објектите во нивната првобитна форма, туку само да ги реновира постојните згради.

Комеморацијата заврши со аплауз за поранешните логораши и полагање цвеќе пред споменикот кај Вториот објект. Пред почетокот на настанот беше отворена и нова постојана изложба посветена на луѓето кои биле затворени во логорот.