Бугарскиот град Перник меѓу финалистите за титулата Европска младинска престолнина 2029

Бугарскиот град Перник е меѓу финалистите во изборот за титулата „Европска младинска престолнина 2029“. Кандидатурата на градот е изградена околу мотото „Move, Connect, Grow“ („Движи се, поврзувај се, развивај се“) и се темели на долгорочна визија за развој на младинските политики, создадена со активно учество на младите, јавува БНР.

Според младинската медијаторка на општината, Викторија Димитрова, пласманот во финалето е признание за континуираната работа на локалната власт и младинските организации во поддршка на младите луѓе.

Меѓу предностите на кандидатурата се активностите на Меѓународниот младински центар, работата на Советодавниот совет за младинска политика и постоењето на функцијата „младински медијатор“, која е реткост во бугарските општини.

„Младите веќе имаат свое место каде што можат да се среќаваат, да разменуваат идеи и да добиваат поддршка. Тоа се стабилни темели врз кои можеме да градиме уште посилни европски партнерства“, изјави Димитрова.

Таа нагласи дека освојувањето на титулата би донело не само престиж, туку и нови можности за настани, иницијативи, професионален развој и поттик за враќање на младите во Перник.

Димитрова истакна дека успехот на кандидатурата зависи од поддршката на целата локална заедница.

Петте градови кои се пласираа во финалната фаза на натпреварот за Европска младинска престолнина 2029 го очекуваат конечниот избор на жирито во ноември оваа година.