Не ја блокирајте бугарско-македонската граница! Србија само тоа го чека

Деница Китанова/Актуално

Неспорно е дека во последните недели односите меѓу Бугарија и Република Северна Македонија ескалираат поради говорот на омраза против македонските Бугари и Бугарија, палењето на бугарските дипломатски автомобили и неподготвеноста на Скопје да ги исполни критериумите за Европската унија и да ги внесе нашите сонародници таму во македонскиот устав. Сосема е нормално тоа да предизвикува емоции кај секој Бугарин, бидејќи, како што вели сопственикот на Канал 5, Емил Стоjменов, во своето барање за добивање бугарско државјанство — „двата народи сме блиски“. Сосема случајно, во контекст на сето ова, Фондацијата „Македонија“ и невладината организација „Куберов воин“ организираат протест — блокада на граничните премини со Северна Македонија.

Тие го избрале неделниот ден, 21 јуни, за својот протест, што, пак, сосема случајно се совпаѓа со традиционалниот собир на Коридор 8 за бугарско-македонско пријателство во Осоговската Планина, кој во претходните пет години собираше луѓе од двете страни на границата во пријателска и позитивна атмосфера. Што излегува? Кому ќе му пречат — на македонските Бугари и на оние што сакаат пријателство со Бугарија?! Блокирајќи ги граничните премини со Северна Македонија, организаторите, сепак, пропуштаат дека границата на Македонците со Србија останува отворена.

Освен тоа, организаторите на протестот, по два часа настапи и покажување мускули на границата, ќе се вратат дома и ќе избегаат од говорот на омраза, и никој нема да ги малтретира. Македонските Бугари, сепак, остануваат таму и последиците ќе бидат за нив. Ги повикувам да ги совладаат своите емоции, да не размислуваат како да блеснат по Македонското прашање и, во таа врска, да го преиспитаат својот протест. Сè уште не е доцна.

Инаку, човек би можел да помисли дека им служат на руските и српските интереси — докажете дека не е така!

Уште една „случајност“ на која би ѝ обрнала сериозно внимание е учеството на Красимир Каракачанов во „Лице в лице“ на бТВ, во кое тој рече дека Бугарија и Северна Македонија одат кон руско-украинско сценарио и дека некој нè турка натаму. Значи, поранешниот министер за одбрана тврди дека Бугарија и Северна Македонија одат кон руско-украинско сценарио?

Каде го заборави НАТО? Двете земји сме членки на Алијансата, која тешко би дозволила таков развој на настаните.

Но, уште повеќе — како историчарот Красимир Каракачанов си замислува дека Бугарија евентуално би ја нападнала Северна Македонија, бидејќи јас така го разбирам неговото излагање?

Сигурна сум дека тој многу добро знае дека сите војни во кои Бугарија учествувала во минатиот век биле токму за да им помогне на Бугарите во историско-географската област Македонија.

И, освен тоа, што се виновни луѓето што се определуваат како Македонци, што се виновни македонските Бугари, што нивната влада и нивната елита се непријателски настроени кон Бугарија?

Оваа аналогија не придонесува за нормализирање на односите, тешко дека ќе го рехабилитира како политичар, но истовремено работи во интерес на Русија и Србија на Балканот, а токму тоа е — да има етничка напнатост.

И зарем не се токму ваквите изјави тие што туркаат кон ова сценарио?