Во украинскиот град Кропивницки се одржа турнир во шах и дама во чест на бугарскиот кан Кубрат
Прв меѓународен отворен турнир во шах и дама во чест на бугарскиот кан Кубрат, владетелот кој ја основал Велика Бугарија во VII век, се одржа во украинскиот град Кропивницки, јавува БНР. Настанот, кој ги обедини спортот, културата и меѓузаедничката соработка, собра претставници на бугарската, ерменската, полската и азербејџанската заедница, соопшти претседателот на Кировоградското областно друштво на Бугарите „Нашите луѓе“, Сергиј Осадчиј.
Целта на настанот беше да го популаризира спортот, да го поттикне интересот за друштвени игри кај младите, да создаде можности за размена на искуства и унапредување на спортското мајсторство, како и да ја промовира историската вистина за бугарско-украинските врски.
На натпреварот учествуваа момчиња и девојчиња на возраст од 12 до 16 години, како и мажи и жени.
„Турнирот се претвори во вистинска платформа за единство, демонстрирајќи солидарност и меѓусебна почит меѓу различните етнички заедници што живеат во Украина“, изјави Сергиј Осадчиј.
Покрај спортската програма, учесниците и гостите проследија и културна програма со концерт со национални мотиви, архивска изложба и изложба на слики и цртежи посветени на бугарско-украинските врски.
Експозициите претставија моменти од заедничката историја и културната интеракција меѓу двата народа.
„Историската фигура на кан Кубрат има особено значење и за Украина, бидејќи историјата и географијата на основаната од него Велика Бугарија се поврзани со територии од денешна Украина. Според историските податоци, неговата држава опфаќала земји од Кубан до регионот на Днепар, што ја прави неговата личност дел од заедничкото историско наследство на двата народа“, раскажа Сергиј Осадчиј.
