Генералниот конзул на Бугарија во Чикаго Станков со честитка по повод Денот на независноста на САД: Пријателството меѓу Бугарија и Америка има длабоки историски корени

Генералниот конзул на Бугарија во Чикаго, Светослав Станков, упати честитка до американскиот народ и до бугарската заедница во САД по повод 4 Јули – Денот на независноста на Соединетите Американски Држави.

Во објава на Facebook, Станков потсети на историската порака од Декларацијата за независност на САД, според која „сите луѓе се создадени еднакви“ и се обдарени со неотуѓиви права, меѓу кои се животот, слободата и стремежот кон среќа.

По повод 250-годишнината од Декларацијата за независност, тој истакна дека историјата на Бугарија и Америка е исполнета со примери на меѓусебно почитување, пријателство и личности кои оставиле траен белег во судбината на двата народа.

Станков посебно се осврна на улогата на Јуџин Скајлер, американскиот генерален конзул во Цариград, кој во 1876 година ја предводел меѓународната мисија за истражување на злосторствата по задушувањето на Априлското востание. Тој потсети и на американскиот воен дописник Џенјуариус Макгахан, чии репортажи од Батак и уништените бугарски населби ја потресле јавноста во Европа и Америка.

Во честитката на генералниот конзул се споменува и Роберт колеџ, првото американско високо училиште надвор од САД, кое, имало значајна улога во образованието на идните градители на модерна Бугарија. Меѓу симболите на врската меѓу двете земји тој го посочи и Џон Винсент Атанасов, син на бугарски емигрант и еден од пионерите во развојот на електронскиот дигитален компјутер.

„Пријателството меѓу Бугарија и САД има длабоки историски корени, изградени врз заеднички вредности – слобода, човечко достоинство, образование и стремеж кон подобра иднина“, порача Станков.

Тој им го честиташе празникот и на сите Бугари кои живеат, работат и постигнуваат успеси во САД, нагласувајќи дека бугарската заедница продолжува достоинствено да придонесува за доброто име на Бугарија како народ на знаењето, слободата, трудољубивоста и достоинството.

„Честит Ден на независноста!“, стои во објавата на генералниот конзул на Бугарија во Чикаго Светослав Станков.