Уметници од Бугарија, Северна Македонија и Србија ќе учествуваат во шестиот меѓународен пленер „Босилеград во боја 2026“
Здружението „ГЛАС“ – Босилеград, во соработка со Студентското читалиште „Св. Климент Охридски“ 1997 – Софија, го подготвува шестото издание на Меѓународниот пленер „Босилеград во боја 2026“, кој ќе се одржи од 12 до 19 јули 2026 година во Босилеград, јавува Радио Бугарија.
Официјалното отворање е закажано за понеделник, 13 јули, во 18:30 часот по локално време, на отворената сцена во дворот пред канцеларијата на здружението „ГЛАС“, каде што се наоѓа и прес-клубот на БТА во Босилеград.
На пленерот ќе учествуваат 17 уметници – седум од Бугарија, пет од Северна Македонија и пет од Србија. За време на престојот, домаќините ќе ги запознаат учесниците со културно-историските места во општината, а предвидени се и посети на босилеградските села и Власинското Езеро. Уметниците ќе имаат можност да ја посетат и Уметничката галерија „Вл. Д. Мајстора“ во Ќустендил.
„Оваа една седмица, колку што трае пленерот, нè исполнува со творечка и креативна енергија, благодарение на која и покрај сите тешкотии наоѓаме смисла да продолжиме да го прикажуваме Босилеград од една поинаква и пошарена перспектива“, изјавија организаторите за порталот ГЛАС ПРЕСС.
Тие додаваат дека од уметниците очекуваат „единствено да ги споделат своите емоции и светови на платната“, а за останатото ќе се погрижат домаќините.
Официјалното затворање ќе се одржи во сабота, 18 јули, во 18:00 часот, кога ќе биде отворена заедничка изложба со делата создадени од учесниците на пленерот.
