Со убави чувства и прекрасни спомени заврши летната школа на бугарски јазик во Тирана

Заврши летната школа на бугарски јазик во Тирана. Toa беа неколку недели исполнети со многу нови знаења. Учесниците го проширија своето знаење за бугарскиот јазик, но и се приближија до бугарската култура и традиции, јавува БНР. Ова се случи благодарение на поддршката на Универзитетот во Велико Трново „Свети Кирил и Методиј“ и на Катедрата за словенски и балкански јазици на Факултетот за странски јазици на Универзитетот во Тирана, како и на вредната работа на доц. д-р Раки Бело, предавач по бугарски јазик и литература на Факултетот за странски јазици во Тирана.

Летната школа во албанскиот главен град беше поддржана од проектот за мобилност во рамките на програмата Еразмус+ на Европската комисија, на која работат двата универзитета. Покрај секојдневната практична настава на бугарски јазик, предводена од доц. д-р Раки Бело и д-р Миранда Бело, деновите за учесниците во школата, станаа уште поинтересни благодарение на присуството на бројни гости говорници од Албанија и Бугарија, кои одржаа предавања со инспиративни теми и ги претставија Бугарија и бугарската култура во нејзиното најдобро светло.

Последните денови од летната школа од 19 до 25 јули беа едни од највозбудливите, исполнети со многу убави моменти и спомени кои долго ќе останат во меморијата на учесниците. За време на жешките јулски денови, тие посетија неколку туристички места во Албанија, а прва дестинација беше туристичкиот град Поградец, на брегот на Охридското Езеро, кој сè уште носи бугарско име, и прекрасниот национален парк Дрилон, во близина на манастирот Св. Наум, кој го носи името на еден од познатите ученици на св. Кирил и Методиј, кој е погребан во црквата на манастирот.

Следната посета беше на туристичкото село Москополе (Алб. Воскопоја), кое во 18 век било значаен културен, трговски и политички град не само на Балканот, туку и во Европа, со првата печатница на Балканот, образовни институти и многу цркви. Овој град е значаен за балканските земји бидејќи тука е објавен речникот на четири балкански јазици: грчки, албански, бугарски и аромански.

Градот Корча беше другата дестинација што ја посетија учесниците во Летната школа по бугарски јазик во Тирана. Корча е многу убав град со богата историја, таму се наоѓа Националниот музеј на средновековна уметност, првото албанско училиште итн. Градот заедно со неговата околина станал дел од бугарското царство во 853 година и бил вклучен во историскиот округ Кутмичевица. И денес во областа Корча има села каде живее бугарското малцинство, кое е поврзувачки мост меѓу двете земји и народи. Тоа се селата од Преспанскиот регион, исто така дел од програмата на учесниците во летната школа, како и селата Врбник, Бобоштица и Дреновени. Покрај посетите на различните туристички места, во рамките на екскурзијата се одржаа и предавања поврзани со архаичните говори кои и денес ги зборуваат жителите на овие села, за нивните носии и традиции.

На 24 јули со скромна, но убава свеченост учесниците на Бугарската летна школа ги добија своите сертификати за учество на обуката, како и мали подароци од претставниците на Универзитетот во Велико Трново „Свети Кирил и Методиј“ – заменик – ректорот проф. д-р Николај К’нев, заменик-претседател на Генералното собрание проф. д-р Владимир Владов и проф. д-р Даниела Тасевска.

Проф. д-р Николај К’нев им честиташе на присутните и ја истакна важноста на ова училиште за промоција на бугарскиот јазик и култура и се заблагодари на деканот на Факултетот за странски јазици на Универзитетот во Тирана проф. д-р Есмералда Кромида за нејзината поддршка и поддршката на факултетот, со кој таа раководи. Благодарници беа упатени и до Катедрата за словенски и балкански јазици, чиј дел е и бугарскиот јазик. Изучувањето на бугарскиот јазик е меѓу приоритетите во стратегијата за интернационализација на Универзитетот во Велико Трново „Свети Кирил и Методиј“. Интересот за бугарскиот јазик во Албанија се должи и на нашите добрососедски односи и на бугарското малцинство во оваа земја, нагласи проф. К’нев.

Четворица студенти од Факултетот за странски јазици, учесници на Летната школа, ќе ги продолжат студиите на бугарски јазик на универзитетите во Софија и Велико Трново. Ова е многу добра практика за студентите на Факултетот на Универзитетот во Тирана, која се спроведува во рамките на соработката со бугарските високообразовни институции.