Почнува филмскиот фестивал „Преку езерото“- во селекцијата е и филмот „Плот“ на бугарскиот режисер Димитар Стојанович

Во Дојран на 8 јули се отвора петтото издание на Средоземноморскиот и Балкански филмски фестивал „Преку езерото“, во чија селекција оваа година има и бугарско учество, јавува БТА. За натпреварувачкиот дел од програмата се селектирани 6 долгометражни, 15 краткометражни и 12 студентски филмови, а специјалниот фокус на изданието е врз современото иранско кино.

Освен бугарскиот филм „Плот“, дебитантско остварување на режисерот Димитар Стојанович, кој ќе биде прикажан на 14 јули, во селекцијата се вклучени кипарскиот филм „Држи се за мене“, српскиот „Кармадона“, иранскиот „Коцкарот“, „Одраз во мртов дијамант“ од Белгија и „Кома“ на режисерот од Северна Македонија Агим Абдула.

Бугарскиот филм „Плот“ ја истражува борбата меѓу плотта и духот и состојбата на луѓето кога се соочени со несовладливи околности. Во него улогите ги толкуваат Весела Бабинова, Пламена Гетова, Јулијан Вергов, Дилјана Попова, Хирофуми Аџичи, Рашко Младенов и други, директор на фотографија е Рали Ралчев, музиката е на Живко Петров, а продуцент е Николај Мутафчиев.

Половина од краткометражните филмови се меѓународни, а другата половина се најновите ленти од Северна Македонија.

Петтото издание на Средоземноморскиот и Балкански филмски фестивал „Преку езерото“ ќе се одржи не само во Дојран, туку и во Струмица и Гевгелија. Во рамките на фестивалот ќе се одржи работилница за разработка и продуцирање сценарија за дипломски и дебитантски краткометражни филмови, во која студенти и дебитанти автори ќе се натпреваруваат за финансиска субвенција во опрема, што би им овозможила да ги продуцираат и реализираат своите филмови.

Годинашниот добитник на наградата за високи уметнички достигнувања во филмската уметност за 2026 година „Мето Јовановски“ е Тони Наумовски, кој дипломирал на НАТФИЗ Крсто Сарафов во Софија и има кариера во театарот, киното и телевизијата во Њујорк, соопштуваат организаторите на фестивалот.