(Видео) Јотова во Пловдив: Од денот на Соединението Бугарија се враќа на географската карта на светот

Соединението на Бугарија е еден од ретките моменти во националната историја кога стремежот кон единство се претворил во моќна сила што ги принудила и домашните и странските политичари да го прифатат соединението на Бугарите, изјави синоќа претседателката на Бугарија Илијана Јотова во Пловдив, во говорот по повод 141-годишнината од Соединението на Бугарија, јавува БТА.

На церемонијата присуствуваа и претседателката на Народното собрание, Михаела Доцова, и премиерот Румен Радев.

„Малку се таквите датуми во бугарската историја. Од овој ден Бугарија се враќа на географската карта на светот, од овој ден се враќа името Бугарија, кое бугарскиот народ никогаш не го изгубил ниту го променил од создавањето на државата до денес“, рече Јотова.

Осврнувајќи се на настаните од 6 септември 1885 година, таа потсети дека ѕвонењето на камбаните го разбудило Пловдив, а илјадници луѓе пред конакот го поздравиле прогласувањето на Соединението на Кнежеството Бугарија и Источна Румелија.

Јотова се повика и на Симеон Радев, авторот на „Градителите на современа Бугарија“, кој подоцна го опишал тој ден како еден од најрадосните во бугарската историја – ден на револуција и среќа за бугарскиот народ.

„По Берлинскиот конгрес, во Кнежеството Бугарија, во Источна Румелија, во Македонија, во бугарските градови и села, бугарскиот народ има една заедничка болка – распарчената татковина, распарчената Бугарија, и не ја прифаќа својата судбина и не се помирува“, рече претседателката.

Таа оцени дека духот на Бугарската преродба, националноослободителните борби и вербата во националното обединување останале живи и во периодот пред Соединението.

„Времиња во кои управниците и народот беа едно, затоа што си ја сакаа државата, ја сакаа татковината обединета и силна“, истакна Јотова, додавајќи дека стремежот кон единство ги надминувал разликите во верата и народноста.

Според неа, дејците на Соединението „не ги пишувале само сопствените биографии“ и не тежнееле кон власт и почести, туку сакале да ја пишуваат „биографијата на народот и на Бугарија“.

„Бугарското Соединение е она величествено дело во нашата историја во кое желбата за единство и обединување се претвори во моќна сила и ги принуди нашите и странските политичари да заборават на стравот, сомнежите и малодушноста“, рече Јотова.

Таа нагласи дека поуките од септември 1885 година остануваат значајни и денес и повика историското единство да се претвори во „моќ, сила и заедничко дејствување“.

Јотова истакна дека пораката „Соединението ја прави силата“, испишана на зградата на Народното собрание, не е само слоган, туку, како што рече, „изстраданата бугарска судбина“ и порака до идните генерации.

„И нашето време денес бара согласност. Ние сме различни, но нека тие разлики бидат за добро и преку разговор и дијалог да ги донесеме најдобрите одлуки за Бугарија“, порача претседателката.

Таа изрази уверување дека довербата во државата, во институциите и меѓу луѓето може повторно да биде изградена, нагласувајќи дека „најголемото богатство сме ние, луѓето на Бугарија“.

„Бугарите имаме огромен потенцијал. Толку многу можеме. Толку многу таленти. Погледнете ги нашите млади луѓе – освојуваат едни од првите места во светот“, рече Јотова и додаде дека нема „изгубена генерација“, бидејќи секој Бугарин е важен и корисен.

На крајот од говорот таа повика споменот на Соединението да не остане само историско сеќавање, туку да се преточува во дела „за една достоинствена, голема и горда Бугарија“.

„Поклон пред дејците на Соединението! Да живее Татковината!“, порача Јотова.