Петрова: Молдавија ја исполни обврската, реформата ја зачува самостојноста на Тараклија
Тараклискиот регион во Молдавија, каде што живеат околу 50.000 Бугари, е зачуван како самостојна административно-територијална единица и доби повисок административен статус, изјави бугарската министерка за надворешни работи Велислава Петрова по средбата со нејзиниот молдавски колега Михај Попшој, јавува БГНЕС.
Според Петрова, со новиот статус Тараклија преминува на повисоко административно ниво.
„Со оваа одлука Тараклија доби правен статус еднаков на оној на главниот град Кишињев и на вториот по големина град Белци“, изјави таа, оценувајќи дека одлуката е важна за бугарската заедница во земјата.
Петрова го посочи и преобразувањето на Државниот универзитет „Григориј Цамблак“ во Тараклија во филијала на Универзитетот „Ангел К’нчев“ од Русе. Во него моментално студираат повеќе од 400 студенти.
На средбата било разговарано и за европската интеграција на Молдавија и енергетската безбедност. Петрова потврди дека Бугарија ќе продолжи да го поддржува Кишињев на патот кон членство во Европската Унија, во согласност со напредокот во реформите и исполнувањето на критериумите.
