Ново бугарско училиште „Бугарче“ ги отвора вратите во Феникс, Аризона

Ново бугарско училиште „Бугарче“ ќе биде отворено на 19 септември во Феникс, американската сојузна држава Аризона. Училиштето ќе работи во рамките на Центарот за бугарско наследство во Аризона, а наставата ќе биде насочена кон изучување на бугарскиот јазик, културата, традициите и наследството, јавува БНР.

Свеченото отворање е закажано за 12 часот по локално време во Ирскиот културен центар во Феникс.

Раководителката на училиштето и потпретседателка на Центарот за бугарско наследство во Аризона, Аделина Петрова, во интервју за БТА изјави дека идејата за отворање бугарско образовно средиште произлегла од интересот на бугарската заедница во сојузната држава.

За време на хуманитарниот божиќен бал, организиран од Центарот во декември 2025 година, била спроведена анкета меѓу припадниците на бугарската заедница за тоа какви настани и активности сакаат да бидат организирани во Аризона.

Покрај филмски проекции, театарски претстави и концерти, меѓу предлозите било и отворањето бугарско училиште.

Според Петрова, училиштето „Бугарче“ е официјално акредитирано од Министерството за образование и наука на Бугарија и ќе работи целосно според наставните планови на Министерството.

Наставата ќе се одржува во сабота и ќе започне на нивоата А1 и А2, согласно Заедничката европска референтна рамка за јазици.

Во првата учебна година училиштето ќе го посетуваат 24 деца, поделени во две групи. Во првата ќе бидат деца на возраст од четири до седум години, а во втората ученици од осум до 12 години.

Тимот на училиштето брои девет лица и го сочинуваат наставници, претставници на Центарот и тричлен родителски совет.

Главниот фокус ќе биде изучувањето на бугарскиот јазик, а предвидени се и дополнителни активности, меѓу кои кореографија, спорт и хор.