Бугарија инвестира во воздушната итна помош: Испорачани три нови хеликоптери

Бугарија доби уште три медицински хеликоптери, со што е завршена клучна фаза од обезбедувањето на воздушната флота за системот за итна медицинска помош по воздушен пат – HEMS.

Информацијата ја соопшти пратеникот од 31. изборна единица – Јамбол, Иван Димитров, кој наведе дека досега за оваа намена се исплатени 35 милиони евра.

„Испорачани се три медицински хеликоптери! Со ова успешно завршуваме клучна фаза од обезбедувањето на воздушната флота за итна медицинска помош (HEMS)“, изјави Димитров.

Следната фаза предвидува изградба на оперативните бази за медицинските хеликоптери. Според Димитров, изградбата на базите е издвоена од основната инвестиција со цел да се ограничи финансискиот ризик и да не се загубат европските средства.

Се разгледува и можноста за користење на веќе постојни објекти, што би овозможило намалување на дополнителните трошоци за бугарската држава.

Димитров посочи дека испораката на хеликоптерите е дел од пошироката модернизација на здравствениот систем во Бугарија, финансирана преку Националниот план за закрепнување и одржливост.

Според податоците што ги презентираше, досега преку Планот се исплатени близу 190 милиони евра.

Развојот на системот HEMS има цел да овозможи побрзо пристигнување на медицинска помош до лица во критична состојба, како и побрз транспорт на пациенти во случаи кога времето е од пресудно значење.