Мултимедијален концерт „Бугарија: Традиција и иднина“ ќе се одржи денеска во Брисел

Мултимедијалниот концерт „Бугарија: Традиција и иднина“, со Нина Николина, составот „Магичните гласови“ и специјалниот гостин Тихомир Јорданов на гајда, ќе се одржи денеска, 4 октомври, во Брисел, Белгија, од 18:30 до 20:30 часот по локално време. Настанот го најавија организаторите од PAVÉ на својата фејсбук-страница, пренесува БТА.

Програмата ќе има титлови на француски јазик, со што ќе биде достапна и за локалната публика, покрај бугарската заедница во белгискиот главен град.

„Бугарија: Традиција и иднина“ е концертен спектакл што „го претвора бугарскиот фолклор во живо, современо и впечатливо доживување“, наведуваат организаторите.

Спектаклот го следи патот на бугарската песна од нејзините древни митолошки корени до светските сцени во 20 и 21 век. Ќе започне со „Излегол е Дељо ајдутин“ во изведба на Нина Николина. Организаторите потсетуваат дека песната е вклучена на златната плоча на вселенската сонда „Војаџер 1“.

Настапот на гајда на Тихомир Јорданов ќе го надополни музичкиот расказ, во кој хорските изведби, нерамноделните ритми и карактеристичното повеќегласие го претставуваат богатството на бугарската традиција.

Мултимедијалните содржини ќе ја прикажат улогата на женскиот глас во зачувувањето на традицијата, поврзаноста на фолклорот со православната духовност и влијанието на бугарската песна на светската сцена.

Програмата содржи осврти на „Мистеријата на бугарските гласови“, како и на Лиза Џерард, Кејт Буш, Џорџ Харисон и Силви Вартан, кои, според организаторите, биле инспирирани од бугарската музика.

Концертот ќе им оддаде почит и на бугарските оперски пејачки Гена Димитрова и Соња Јончева. За завршницата се најавени песните „Облаче бело“ и „Убава си, горо моја“, кои, како што наведуваат од PAVÉ, „ја претвораат носталгијата во мост меѓу татковината и светот“.