„Иглика килим фест“ награден во Велико Трново за најоригинален настан во културниот туризам за 2025 година
Фестивалот „Иглика килим фест“ ја доби наградата за најоригинален настан во областа на културниот туризам за 2025 година на конкурсот READ AND TRAVEL, во рамките на 21. Меѓународен саем „Културен туризам“ во Велико Трново, соопшти Општина Габрово.
Почесната грамота и наградите на културниот центар „Невена Коканова“, организатор на фестивалот, ги врачи заменик-градоначалникот на Габрово, архитект Николај Меразчиев. Настанот е финансиран преку програмата „Култура“ на Општина Габрово.
Фестивалот се одржа во август 2025 година во селото Иглика, познато како „Каменото гнездо“. На отворено, на површина од 10 декари, беа изложени близу 900 автентични рачно ткаени бугарски килими од XVIII, XIX и XX век. Уште околу 100 примероци беа поставени меѓу камените градби во селото.
Килимите се дел од колекцијата на Холанѓанецот Јаков ван Бејлен, кој живее во Бугарија и е почитувач на бугарското нематеријално културно наследство.
„Големата награда за ‘Иглика килим фест’ е признание не само за еден успешен фестивал, туку и за моќта на културата да ги оживува малите места, да привлекува луѓе и да раскажува приказни што нè поврзуваат“, наведуваат од Општина Габрово.
Од Општината истакнуваат дека ваквите иницијативи ја потврдуваат важноста на соработката меѓу Габрово и Велико Трново во рамките на кандидатурата за Европска престолнина на културата во 2032 година.
Меѓународниот саем „Културен туризам“ е основан по иницијатива на Општина Велико Трново и се организира заедно со бугарското Министерство за туризам, со поддршка од Министерството за култура. Настанот е дел од Годишната програма за национална туристичка промоција.
