Безбедноста во Црното Море: Министерката за надворешни работи на Бугарија,Велислава Петрова, се среќава со германскиот колега Јохан Вадефул
Министерката за надворешни работи на Бугарија, Велислава Петрова, е во работна посета на Германија. Во Берлин таа ќе се сретне со сојузниот министер за надворешни работи Јохан Вадефул. На средбата ќе бидат разгледани актуелни теми од меѓународната и европската агенда, меѓу кои и безбедноста во Црното Море, јавува БНТ.
Откако во последните осум дена во исклучивата економска зона на Бугарија со дронови беа погодени четири трговски брода, темата за одбраната несомнено е во фокусот. Бугарија веќе побара помош од ЕУ и НАТО за засилување на надзорот на воздушниот и морскиот простор.
Шефицата на бугарската дипломатија Велислава Петрова ги оцени нападите во Црното Море како целосно неприфатливи и како дрско кршење на меѓународното право и на принципите за безбедна пловидба.
Германскиот министер за надворешни работи исто така излезе со став во кој ги осудува нападите врз трговски бродови во Црното Море. Тој истакна дека тие претставуваат напад врз меѓународната пловидба и глобалната безбедност на снабдувањето со храна и ги лишуваат најранливите од итно потребните намирници.
„Ги осудувам ужасните напади врз трговски бродови во Црното Море. Тие претставуваат напад врз меѓународната пловидба и глобалната безбедност на снабдувањето со храна и ги лишуваат најранливите од итно потребните намирници. Нашите мисли се со жртвите, а нашата солидарност е со нашиот сојузник Бугарија“, изјави Јохан Вадефул, министер за надворешни работи на Германија.
Двајцата министри ќе разговараат и за проширувањето на ЕУ и поврзаноста — тема исклучително важна и за Бугарија и за Германија, особено кога станува збор за Западен Балкан. Германија и Франција предложија модел за постепена интеграција во замена за реформи. Со тоа на земјите кандидатки за членство би им се овозможил пристап до единствениот пазар и можност да испраќаат набљудувачи во институциите на ЕУ.
Ставот на Бугарија е јасен: Земјите кандидатки за членство мора да ги почитуваат преземените обврски.
