Празникот на бугарските Военовоздухопловни сили ќе биде одбележан во Софија
Со свечен ритуал на положување венци и свежо цвеќе пред Споменикот на авијатичарот во Софија денеска 16 октомври ќе биде одбележан Празникот на авијацијата и бугарските Военовоздухопловни сили (ВВС), соопштија од прес-центарот на Министерството за одбрана, пренесува БТА.
Годинава се навршуваат 114 години од првиот борбен лет на бугарската воена авијација. По традиција, ќе им биде оддадена воена почит на бранителите на бугарското небо, кои загинале за слободата на Бугарија и при извршување на својата воена должност во мирновременски услови.
Претседателката и врховна командантка на Вооружените сили Илијана Јотова ќе учествува во одбележувањето на Празникот на авијацијата и бугарските Военовоздухопловни сили, соопштија од прес-секретаријатот на шефот на државата. Претседателката ќе ја прими почесната гарда и ќе положи венец во спомен на авијатичарите загинати за Татковината.
Во ритуалот ќе учествуваат и министерот за одбрана Димитар Стојанов, началникот на одбраната адмирал Емил Ефтимов, претставници на командниот состав и припадници на ВВС, Гардискиот репрезентативен дувачки оркестар и репрезентативна формација од Националната гардиска единица. Поканети се и претставници на видовите вооружени сили, Претседателството, владата, дипломатскиот кор, локалната власт, ветерани од ВВС и други.
На 16 октомври е годишнината од првиот во историјата на бугарската авијација и во Европа лет на авион (1912 г.) со извидувачка цел во реални борбени услови за време на Балканската војна (1912-1913 г.). Покрај извидувањето на силите на противникот, било извршено и првото над Стариот континент бомбардирање од воздух во вистински фронтовски услови. Пилотот поручник Радул Милков и набљудувачот поручник Продан Таракчиев летаат со својот „Албатрос“ над Одринската тврдина, го извидуваат распоредот на резервите и успеваат да фрлат две рачни гранати над железничката станица Караагач.
