Бугарија се кандидира за нов мандат во Извршниот совет на UN Tourism
Бугарија поднесе кандидатура за нов мандат во Извршниот совет на Светската организација за туризам при ОН (UN Tourism), со цел да го продолжи учеството во раководството на организацијата до 2031 година, соопшти бугарското Министерство за туризам.
Кандидатурата го опфаќа периодот 2027–2031 година. Бугарија е членка на организацијата од 1976 година, а последен пат беше избрана во Извршниот совет во 2023 година.
„Работиме Бугарија да има реален придонес во одлуките за иднината на туризмот. Зад нашата кандидатура стојат силни меѓународни партнерства и настани што ќе ги реализираме“, изјави министерот за туризам д-р Илин Димитров.
„Нашето учество во организацијата, која ги носи клучните одлуки за светскиот туризам, треба да донесе конкретни резултати за нашата земја“, нагласи Димитров.
Бугарија во кандидатурата поставува пет главни приоритети: одржлив туризам, инвестиции и иновации, образование и квалификации, развој на регионални туристички маршрути и користење податоци при донесувањето одлуки.
Земјата ќе работи и на проширување на соработката меѓу државите членки и на реализација на заеднички иницијативи.
