Претседателски избори во Бугарија: Јотова и Ѓуров во втор круг со разлика од 42.715 гласа при 100% преброени записници

Официјално – Илијана Јотова и Кирил В’лчев ќе се соочат во вториот круг со тандемот Андреј Ѓуров – Георги Кандев на 1 ноември. Разликата меѓу Јотова – В’лчев и Ѓуров – Кандев е само 42.715 гласа, јавува 24 Часа.

Ова го покажуваат податоците на Централната изборна комисија при 100% обработени записници.

По обработката на записниците од избирачките одбори во окружните изборни комисии, резултатите се:

• Илијана Јотова – Кирил В’лчев: 34,759% (528.929 гласа)
• Андреј Ѓуров – Георги Кандев: 31,952% (486.124 гласа)
• Костадин Костадинов и Петар Волгин: 12,545% (190.894 гласа)
• Радостин Василев и Красимир Манов: 4,608% (70.118 гласа)
• Ивелин Михајлов и Јулијана Матеева: 3,787% (57.633 гласа)
• Иван Христанов и Стојанка Черкезова: 2,393% (36.414 гласа)
• „Не поддржувам никого“: 4,426% (67.353 гласа)

Не беше исполнет ниту еден од двата уставни услова за избор во првиот круг – кандидатот да добие над 50% од гласовите и да гласаат 50% од избирачите запишани во избирачкиот список. Излезноста во текот на денот не надмина 22,5%, што е најнискиот одѕив на претседателски избори во Бугарија досега.

На последните претседателски избори во 2021 година, во првиот круг гласаа 40,5%, а во вториот – 34,84%.

На парламентарните избори во Бугарија на 19 април годинава, излезноста достигна дури 51,11%, односно над 3,3 милиони гласачи.