Во Софија ќе се одржи форум за истражувачките пристапи во наставата по бугарски јазик

Институтот за бугарски јазик „Проф. Љубомир Андрејчин“ при Бугарската академија на науките (БАН) го организира единаесеттиот форум „Истражувачки пристапи во наставата по бугарски јазик“, соопштија од институтот, пренесува БТА.

Форумот ќе се одржи на 30 октомври од 9:00 часот во салата БИАД во Софија, на улицата „Г. С. Раковски“ бр. 108. Тој се одржува во рамките на проектот „Напишаното останува. Пишувај правилно!“ и со поддршка на Националната научна програма „Развој на научните истражувања и иновациите во системот на бугарското предучилишно и училишно образование“.

Според организаторите, форумот собира научници, универзитетски професори, наставници и експерти по бугарски јазик за размена на научни знаења, педагошки искуства и добри практики во јазичната настава. Неговата главна цел е да ја зајакне врската меѓу научните истражувања и училишната практика преку дискусија за актуелните предизвици во наставата по бугарски јазик и претставување решенија засновани на научни резултати.

Меѓу водечките теми се создавањето мрежи за соработка меѓу истражувачите и наставниците, развојот на критичкото мислење и творечките способности на учениците и поттикнувањето на нивниот истражувачки дух, соопштија од институтот.