Директна авиолинија повторно ќе ги поврзува Бугарија и Ерменија

Заменик-министерката за надворешни работи на Бугарија, Иванка Ташева, и заменик-министерот за надворешни работи и меѓународна трговија на Република Ерменија, Вахан Костанјан, учествуваа на официјална церемонија по повод обновувањето на директната авиолинија меѓу Софија и Ереван. Патниците со првиот лет пристигнаа на аеродромот „Звартноц“ на 7 ноември годинава.

По повеќе од една година прекин и како резултат на континуираните напори на бугарските и ерменските институции и партнери, директните летови меѓу двете престолнини повторно ќе се одвиваат двапати неделно – секој четврток и сабота.

За време на церемонијата, двајцата заменици-министри го истакнаа значењето на обновената авиоврска за развојот на билатералната соработка, вклучително и за подобрувањето на поврзаноста меѓу Бугарија и Ерменија и создавањето дополнителни можности за проширување на контактите во областа на бизнисот, културата, академската размена и туризмот.

На настанот присуствуваа и претседателката на Комитетот за туризам на Република Ерменија, Анушик Аветјан, амбасадорот на Република Бугарија во Ереван, Никола Николов, шефот на Делегацијата на ЕУ во Република Ерменија, амбасадорот Василис Марагос, како и други претставници на ерменските државни институции и на бугарската дипломатска мисија во Ереван.