Жителите на Сливен, Бугарија, даруваат крв за повредените на автопатот „Тракија“
Втор ден продолжува крводарителската акција во Сливен, Бугарија, по иницијатива на обласната болница „Д-р Иван Селимински“. Пред Центарот за крводарување и утринава се создадоа редици од граѓани што чекаат доброволно и бесплатно да даруваат крв за повредените во тешките сообраќајни несреќи на автопатот „Тракија“ кај Јамбол, јавува БНР.
За денеска се пријавиле десетици лица што сакаат да даруваат крв. Само вчера во центарот дошле повеќе од 70 лица, изјави директорот на обласната болница, д-р Владислав Петров.
„Од пладне почнаа да доаѓаат граѓани на Сливен. Вечерта завршивме околу 20 часот. Денеска продолжуваме, а во Одделението за трансфузиона хематологија имаме и дополнително пријавени лица што ќе дојдат да даруваат крв.“
Граѓаните што чекаа пред Центарот за крводарување објаснија дека трагедијата на патот ги поттикнала да покажат солидарност со повредените и нивните семејства.
„Гледав на телевизија, на вестите, и сакам доброволно да дарувам крв. И јас сакам да помогнам колку што можам. Видов дека трагедијата е голема. Треба да се помага во тешки моменти, секако, и упатувам повик до сите што можат да даруваат, бидејќи ова може секому да му се случи.“
Сите повредени сместени во болницата „Д-р Иван Селимински“ се во стабилна состојба. Само еден е во животна опасност, но засега нема да биде транспортиран, изјави д-р Петров.
„Низ Ургентното одделение поминаа 23 лица, а 18 останаа кај нас на лекување. Четворица пациенти се на интензивна нега и се во потешка состојба. Меѓу нив има маж со повеќекратни повреди, кој е во тешка состојба и во животна опасност.“
На прашањето дали има пациенти што ќе треба да бидат транспортирани во други болници, д-р Петров одговори:
„Засега немаме пациенти што треба да бидат пренесени. Пациентот за кого зборуваме, оној во тешка состојба, има скршени пршлени. Откако ќе се стабилизира и ќе му се подобри состојбата, ќе биде пренесен во болница каде што може да се изврши стабилизација на ’рбетот. Значи, нема да се користи воздушен транспорт. Денеска нема да се користи воздушен транспорт.“
Денеска, на денот на национална жалост за жртвите во сообраќајните несреќи на автопатот „Тракија“, знамињата на институциите во Сливен се спуштени на половина копје. Сливенскиот митрополит Арсениј ќе отслужи заупокојна молитва за загинатите.
