Бугарскиот брод „Св. св. Кирил и Методиј“ ќе работи на девет научни проекти на Антарктикот

Бугарскиот истражувачки брод „Св. св. Кирил и Методиј“ ќе учествува во реализацијата на девет научни проекти во рамките на 35. бугарска антарктичка експедиција, соопшти координаторот на проектите, проф. д-р Борислав Александров, во емисијата „Попладне за љубопитните“ на БНР.

Бродот ќе престојува околу два месеца во близина на островот Ливингстон. Покрај научните истражувања, ќе превезува научници, опрема и намирници за бугарската база „Св. Климент Охридски“ и за други истражувачки тимови, вклучително и за шпанските бази.

„Работата на координаторот е да го оптимизира користењето на бродот за деветте проекти што треба да се реализираат“, објасни Александров.

Во истражувањата ќе учествуваат и научници од САД, Колумбија, Германија, Франција, Грција, Романија, Обединетите Арапски Емирати, Уругвај и Австралија.

Меѓу планираните активности се подводни археолошки истражувања во водите на Јужните Шетландски Острови. Научник од Австралија со бугарско потекло, во соработка со истражувачи од Институтот за подводно наследство кај Созопол, ќе бара остатоци од потонати бродови од времето на китоловните експедиции пред повеќе од 200 години.

Бугарски и германски научници ќе ги испитуваат правецот и брзината на морските струи во Брансфилдовиот Проток. Првпат во подрачјето на бугарската база ќе биде поставена пловка од системот „Арго“, која ќе собира податоци за соленоста и спроводливоста на водата.

Предвидени се и бугарски геолошки проекти поврзани со сеизмичката активност на глечерите, како и поставување привремени кампови на соседни острови, меѓу кои и Смит.

Според планот што го претстави Александров, неговата група ќе отпатува на 22 декември, а бродот треба да ги преземе учесниците на 25 декември и да пристигне пред бугарската база пред крајот на годината. Тој нагласи дека временските услови ќе бидат пресудни за спроведувањето на теренската работа.