„Амазон“ со донација од 1 милион долари за бугарскиот институт за компјутерски науки и вештачка интелигенција INSAIT
Amazon Web Services донира 1 милион американски долари на Институтот за компјутерски науки, вештачка интелигенција и технологии (INSAIT) при софискиот универзитет „Свети Климент Охридски“. Ова го соопшти прес-центарот на бугарското Министерство за образование и наука (МОН).
Финансирањето е обезбедено заради високите достигнувања на институтот и е планирано да биде инвестирано во областа на истражувањата на формалните методи.
Со таа донација ќе се обезбеди поддршка за платите на истражувачите, а исто така и стипендии за докторанти и студенти на институтот. Заедно со ова, започнува и стратешкото партнерство помеѓу истражувачите и инженерите на INSAIT и веб сервисите на Амазон.
„INSAIT е првиот истражувачки институт од светска класа во Источна Европа, структуриран по линијата на водечките светски истражувачки институции. За краток период, INSAIT успеа да привлече извонредни меѓународни истражувачи во компјутерската визија и машинското учење, како и студенти-докторанти од целиот свет“, се вели во официјалното соопштение на Amazon Web Services за донацијата.
Поддршката на Amazon ќе му помогне на INSAIT да привлече врвни истражувачи во областа на вештачката интелигенција и формалните методи.
„Среќни сме што го поддржуваме INSAIT со донација од 1 милион американски долари и помагаме да се привлечат професори од оваа научна област“.
„Институтот е инспиративна иницијатива и со нетрпение очекуваме да воспоставиме поблиски истражувачки врски и механизми за соработка со студентите“, рече потпретседателот на Amazon Web Services и еден од најпознатите инженери во светот Бајрон Кук.
„Ова е важен чекор за нас бидејќи формалните методи се фундаментална област на компјутерската наука и со растечко практично значење во широк опсег на сфери, вклучително во областите безбедност на информациите, сигурна вештачка интелигенција, роботиката и многу други. Финансиската поддршка ќе ни овозможи да го прошириме полето на нашето истражување во оваа област“, вели проф. д-р Мартин Вечев, основач на INSAIT.
