Археолозите претставија нови откритија од Трапезица во Велико Трново, Бугарија
Археолози откриле околу 30 сребрени јадра и инготи, како и делови од производствена печка на ридот Трапезица во Велико Трново, што укажува на можно постоење ковачница за монети. Наодите беа претставени на настан посветен на резултатите од 20-годишните археолошки истражувања и реставрацијата на локалитетот, јавува БТА.
Според археолозите, сребрените предмети по големината и составот одговараат на монетите ковани за време на цар Иван Шишман. Тие претпоставуваат дека објектот бил уништен во османлискиот период.
Со истражувањата, обновени во 2006 година, се откриени станбени квартови, улици, цркви, некрополи, делови од тврдинскиот ѕид и комплекси поврзани со високи црковни и световни личности.
Архитектката Милена Каменова претстави проект за конзервација и реставрација на шест целини, нарачан од Општина Велико Трново и финансиран од Министерството за култура. Предвидени се делумни реконструкции, информативни табли со тридимензионални прикази и виртуелни реконструкции. Проектот допрва треба да биде одобрен и усогласен.
Настанот го организираше Националниот археолошки институт со музеј при Бугарската академија на науките, со поддршка од Академијата и Општина Велико Трново.
