Бојко Василев и Албена Колчакова преку документарец разкажуваат за реставрацијата на бугарскиот игран филм „Крадецот на праски“

Што памети филмската лента? И можеме ли да го воскреснеме мигот? Овие прашања си ги поставува новиот документарен филм на БНТ „Траги по лентата“, кој ќе биде емитуван во рубриката „Во кадар“ оваа среда, 25 февруари, од 21:30 ч. на БНТ 1.

Неодамна филмотеките на Србија, Бугарија и Црна Гора го реставрираа ремек-делото на бугарскиот режисер В’ло Радев „Крадецот на праски“. Создаден во 1964 г. според новела на Емилијан Станев, филмот ја раскажува љубовната приказна меѓу Бугарката Лиза, сопруга на командантот на Велико Трново, и српскиот воен заробеник Иво. Дејството се одвива на крајот на Првата светска војна.

Гледачите ќе ја запаметат играта на првата дама на бугарското кино Невена Коканова и на познатиот српски актер Раде Марковиќ, како и мајсторството на В’ло Радев, кој го прави своето режисерско деби со овој филм. Зад кадар ќе остане една голема тема – тешките односи меѓу Бугарите и Србите во историјата, кои филмот ќе ги доведе до катарза.

Бојко Василев и неговиот тим тргнуваат по трагите на сето тоа во „Траги по лентата“ – филм за филмот, расказ за расказот. Новинарот користи извадоци од неговото интервју со незаборавниот Раде Марковиќ, снимено на крајот од 2009 г., непосредно пред неговата смрт. Посебно е интервјуиран и неговиот син, режисерот Горан Марковиќ, возбуден од реставрацијата на „Крадецот на праски“. Специјалистите од Бугарија и Србија го опишуваат обновувањето на црно-белата филмска лента. А семејството историчари Оливера и Петар Драгишиќ ја прават врската меѓу филмот на В’ло Радев, бугарско-српските односи и мотивот за праската.

„Секогаш сум сметал дека „Крадецот на праски“ е уникатна, неповторлива појава на Балканот“, тврди Бојко Василев. „Тој не само што го прифаќа Другиот, туку и го разбира. И ја издигнува бугарската култура на таква морална височина што предизвикува заклучоци и денес“.

Автори на документарниот филм „Траги по лентата“ се Бојко Василев и Албена Колчакова, режисер и оператор е Л’чезар Аврамов.