Бугарија ги усогласи измените на спогодбата со РС Македонија за изградба на трансграничен железнички тунел дел од Коридор 8

Владата на Бугарија одобри измени во Спогодбата со Република Северна Македонија за подготовка, изградба и експлоатација на трансграничен железнички тунел. Финалниот документ е резултат на размена на белешки и предлози меѓу двете страни, соопштија од прес-службата на бугарската влада, пренесува БГНЕС.

Измените предвидуваат Спогодбата да биде потпишана и на англиски јазик, со цел доставување до Европската комисија и европските финансиски институции. Уточнета е и должината на тунелот, со јасна распределба на деловите што ќе припаѓаат на секоја од двете држави. Според договорот, по пуштањето во употреба секоја држава ќе биде одговорна за одржувањето на својот дел од инфраструктурата.

Подписот на Спогодбата е значаен чекор кон поврзување на железничките системи на Бугарија и Северна Македонија и дел од завршувањето на коридорот Софија – Скопје – Драч – Бари. Овој правец е дел од транспортниот коридор „Западен Балкан – Источно Средоземје“ и стратешкиот Коридор VIII.

Документот треба да биде официјално потпишан до крајот на годината. Притоа ќе биде формиран Заеднички координациски комитет кој ќе раководи со активностите за изградба и експлоатација на тунелот.