Бугарија го избира својот седми претседател

Бугарските граѓани денес го избираат својот седми претседател. Вкупно 6 милиони и 590 илјади граѓани ќе имаат можност да избираат меѓу 27 кандидатски двојки за претседател и потпретседател. Вкупно 46.001 лице ќе гласаат првпат, јавува БТА.

Изборниот ден започнa во 7:00 часот и завршува во 20:00 часот, а доколку пред избирачкото место има гласачи што не гласале, гласањето може да продолжи најдоцна до 21:00 часот, се наведува во роковникот на Централната изборна комисија (ЦИК). На избирачките места надвор од земјата гласањето исто така започнува во 7:00 часот и завршува во 20:00, односно во 21:00 часот по локално време.

Во земјата ќе се гласа со машини на 9.373 избирачки места, а на 2.249 од нив ќе има по две машини. Вкупниот број машини е 11.622.

На 30 јули 2026 година Народното собрание одлучи да се воведе целосно машинско гласање на избирачките места со повеќе од 300 избирачи.

Гласање во странство

За изборите во странство ќе бидат отворени 613 избирачки места во 60 држави. На 242 од нив ќе се гласа со машина, а на 24 ќе има по две машини. Најмногу избирачки места се предвидени во Обединетото Кралство – 82, и во Турција – 78. Во Германија ќе има 70 избирачки места, во Шпанија – 67, а во САД – 44.

Адресите на избирачките места надвор од земјата можат да се најдат тука, како и во апликацијата на ЦИК за претседателските избори – „Избори 360°“.

На 30 јули 2026 година парламентот го укина ограничувањето за најмногу 20 избирачки места надвор од дипломатските и конзуларните претставништва во држави што не се членки на Европската Унија.

Гласање на лицата со попреченост

За лицата со попреченост ќе бидат отпечатени 1.500 тактилни шаблони за гласање со хартиени гласачки ливчиња. Тактилниот шаблон целосно го покрива гласачкото ливче, има квадратни и кружни отвори на местата за означување на гласот на избирачот и ги содржи броевите на партиите, иницијативните одбори и полето „Не поддржувам никого“, испишани со Брајовото писмо.

Избирачите со оштетен вид или со тешкотии во движењето ќе можат да гласаат на местата определени за таа цел – претежно на првиот кат од зградите во кои се сместени избирачките комисии. Тие можат да гласаат на соодветно избирачко место по сопствен избор, а избирачите со оштетен вид можат да гласаат самостојно. Кога избирачот има оштетен вид, слух или друга попреченост што го оневозможува извршувањето на потребните дејства при гласањето, претседателот на комисијата може да дозволи гласањето, вклучително и со машина, да се изврши со помош на придружник избран од избирачот.

Апликацијата „Избори 360°“

Во апликацијата на ЦИК „Избори 360°“, во делот „За избирачи“, корисниците добиваат информации за изборниот процес и целосен список на кандидатите за претседател и потпретседател на претстојните избори. Таму има интерактивна карта на избирачките места, како и симулатор за машинско гласање, преку кој корисниците можат практично да ги увежбаат чекорите за гласање со машина.

Преку апликацијата избирачите можат да ја проверат и адресата на своето избирачко место преку електронските услуги на Главната дирекција „Граѓанска регистрација и административно опслужување“ (ГРАО), како и да поднесуваат пријави што се испраќаат директно на електронската пошта на ЦИК. Апликацијата овозможува и следење на резултатите од секоја избирачка комисија според географската локација, вклучително и на оние во странство. Работата на избирачките комисии на денот на изборите може да се следи во реално време на порталот evideo.bg.

Во делот „За избирачките комисии“ во „Избори 360°“ ќе се објавуваат електронски верзии на записниците за резултатите од гласањето со хартиени ливчиња, машинското гласање и контролните пребројувања.

Објавување на резултатите

Веднаш по прогласувањето на крајот на изборниот ден, но не пред 20:00 часот, избирачката комисија го утврдува резултатот од гласањето, составува записник и го предава на реонската изборна комисија (РИК). На ист начин работат и избирачките комисии надвор од земјата. Во рок од 48 часа по завршувањето на гласањето, РИК ги утврдува и ги објавува резултатите од гласањето во изборниот реон и составува записник, кој го испраќа до ЦИК. ЦИК на својата интернет-страница објавува прелиминарни резултати од обработката на записниците на избирачките комисии во РИК, по избирачки места. Најдоцна 48 часа по завршувањето на изборниот ден, Комисијата ги објавува резултатите од изборите и имињата на избраните претседател и потпретседател на републиката.

Втор круг

Доколку ниту еден од кандидатите на изборите за претседател и потпретседател не биде избран, ЦИК ги определува двете кандидатски листи што добиле најголем број гласови и закажува ново гласање, кое ќе се одржи на 1 ноември 2026 година. Според Уставот, за избран се смета кандидатот што добил повеќе од половината важечки гласови, доколку на гласањето учествувале повеќе од половината избирачи.