Бугарија го презема командувањето со Црноморската група за противмински мерки

Бугарија го презема командувањето со Црноморската група за противмински мерки од Турција, јави Анадолската агенција, пренесува БГНЕС. Командувањето со групата, во која членуваат Бугарија, Романија и Турција, се ротира на секои шест месеци.

Од почетокот на функционирањето на 1 јули 2024 година, групата спровела 10 активации. Нејзината основна мисија е обезбедување слобода на пловидбата преку набљудување, противмински операции, отстранување морски опасности и активности за пребарување и спасување.

На маргините на самитот на НАТО во Анкара, министрите за одбрана на трите земји потпишаа измена на меморандумот со која во мисиите на групата се додава и заштитата на критичната подводна инфраструктура.

Романското Министерство за одбрана соопшти дека потпишувањето го потврдува заедничкиот ангажман на трите сојузнички земји за зајакнување на безбедноста во Црното Море и продлабочување на сојузничката поморска соработка. Според министерството, заштитата на критичната подводна инфраструктура бара „комплексен, интегриран и долгорочен пристап“.

Романскиот миночистач „Капитан Константин Думитреску“ ќе учествува во 11. активација на групата од 9 до 24 јули, во рамки на мултинационалната вежба BREEZE 2026.