| |

Бугарија и Молдавија ќе ја продлабочат соработката во областа на граничната безбедност и во борбата против нерегуларната миграција

Бугарија и Молдавија ќе ја продлабочат соработката во областа на граничната безбедност и во борбата против нерегуларната миграција, соопшти Министерството за внатрешни работи на Бугарија, пренесува БТА.

Бугарскиот министер за внатрешни работи Иван Демерџиев е во посета на Молдавија на покана на неговата молдавска колешка Даниела Мисаил-Никитин. Во бугарската делегација се и главниот комесар Антон Златанов, директор на Главната дирекција „Гранична полиција“, и проф. д-р Илин Савов, ректор на Академијата на МВР.

Продлабочувањето на билатералното партнерство во областа на внатрешните работи и безбедноста било една од главните теми на средбата. Посебно внимание било посветено на промените во безбедносната состојба во Црноморскиот регион и на последиците од војната во Украина. Бугарската страна го истакнала значењето на поблиската регионална соработка, размената на информации и заедничките напори за борба против прекуграничниот организиран криминал, криумчарењето мигранти, недозволената трговија со оружје и новите безбедносни закани, соопшти бугарското МВР.

На средбата бил потпишан првиот билатерален акциски план за 2027 година, со кој се утврдуваат областите и начините на соработка меѓу двете министерства. Документот предвидува размена на стручни знаења и добри практики во областа на граничната безбедност, полициската работа и управувањето со кризи, како и во справувањето со нерегуларната миграција, организираниот криминал, киберкриминалот и хибридните закани, се наведува во соопштението.

За време на посетата бил потпишан и меморандум за разбирање меѓу Академијата на МВР на Бугарија и молдавската академија „Штефан чел Маре“, кој ќе ја поттикне соработката во полициското образование и стручната обука.

Демерџиев изјавил дека Бугарија ја смета Молдавија за важен партнер за безбедноста во регионот. Тој нагласил дека заедничката цел е активниот политички дијалог да прерасне во трајно институционално партнерство со конкретни резултати. Со оглед на сè поголемите предизвици за европската безбедност, соработката добива уште поголемо стратешко значење, додал министерот.

На средбата се разговарало и за проширување на соработката меѓу надлежните служби и за зајакнување на нивните капацитети за заедничко справување со современите безбедносни закани. Демерџиев ја потврдил континуираната поддршка на Бугарија за европската интеграција на Молдавија и подготвеноста на неговата земја да ги сподели своето искуство и стручните знаења за примена на европските стандарди во областа на внатрешните работи.

Од бугарското МВР соопштија и дека во рамките на посетата се предвидени средби со раководствата на Генералниот инспекторат на граничната полиција, Генералниот инспекторат на полицијата и Националниот антикорупциски центар на Молдавија.

Слични Објави