Бугарија испрати 97 војници во мисијата на НАТО КФОР во Република Косово
Бугарски воен контингент од 97 припадници на бугарската армија беше свечено испратен на 16 јули од Стара Загора за учество во силите на Регионалната команда „Запад“ на мисијата на НАТО КФОР во Република Косово.
Војниците ќе бидат распоредени во базата „Вилаџо Италија“, каде во следните шест месеци ќе извршуваат задачи за патролирање, набљудување и поддршка на безбедноста во зоната на одговорност.
Началникот на политичкиот кабинет на бугарскиот министер за одбрана, Владко Владов, им посака успешна мисија и истакна дека учеството во КФОР покажува оти Бугарија активно придонесува за мирот и стабилноста на Западен Балкан.
„Претстојната мисија е значајна за зголемување на способностите на Бугарската армија и за исполнување на сојузничките обврски на земјата“, изјави Владов.
Командантот на копнените сили, генерал-мајор Дејан Дешков, потсети дека бугарски војници веќе 26 години учествуваат во КФОР и придонесуваат за угледот на Бугарија и нејзините вооружени сили преку својата дисциплина и професионализам.
Во контингентот има припадници на Втората тунџанска механизирана бригада, Заедничката команда на силите, Воената полиција, мобилната комуникациско-информациска единица и Воено-медицинската академија.
