Бугарија освои 4 медали на Меѓународната олимпијада по физика во Париз

Бугарските средношколци се вратија од Меѓународната олимпијада по физика со четири бронзени медали и една пофалница. Престижното натпреварување оваа година се одржа во Париз и собра над 400 ученици од 85 држави, јавува БГНЕС.

Олимпијадата се состои од два круга – експериментален дел со две задачи и теоретски дел со три задачи. Бугарија беше претставена од петмина талентирани ученици: Христо Христов од СМГ „Паисиј Хилендарски“, Илија Ников од ПМГ „Васил Друмев“ во Велико Трново, Петар Петров и Светослав Арабов од МГ „д-р Петар Берон“ во Варна, како и Александар Николов од ПЧМГ во Софија. Тимот го водеа проф. д-р Мирослав Абрашев и доц. д-р Нено Тодоров од Физичкиот факултет на Софискиот универзитет „Св. Климент Охридски“.

Бронзените медали ги освоија Христо Христов, Илија Ников, Александар Николов и Светослав Арабов, додека Петар Петров доби пофалница за своето успешно претставување.

Меѓународната олимпијада по физика се организира од 1967 година по иницијатива на Бугарија, Полска, Чехословачка, Унгарија и Романија. Од своето основање, Бугарија учествувала на сите изданија и досега има освоено вкупно 150 медали и признанија.