Бугарите во Лас Вегас ја трогнаа градоначалничката со својата љубов кон буквите, таа го прогласи 24 мај за празник во градот

На 17 мај, Бугарите во Лас Вегас организираа импресивен фестивал посветен на бугарската азбука и писменост, на кој присуствуваа градоначалничката на градот Шели Баркли и бугарскиот конзул во Лос Анџелес, Бојко Христов, јавува 24 часа.

Овој гест градоначалничката Шели Баркли го прави за прв пат за Бугарите во градот.

„Оваа година фестивалот ќе биде историски и исклучително возбудлив – напиша на Фејсбук Бојко Христов. – Имав честа да ја поканам градоначалничката на Лас Вегас, г-ѓа Шели Баркли, да празнува со нас – и таа ја прифати поканата. Ова ќе биде првото учество на актуелен градоначалник на градот на еден голем бугарски настан! Со голема благодарност сакам да споделам дека г-ѓа Баркли ќе ми предаде прокламација со која 24 мај ќе се прогласи за празник на бугарската култура во Лас Вегас – градот на светлата! Благодарност до Bulgarian Society of Nevada, како и до сите сонародници кои со срце го чуваат бугарскиот дух овде, далеку од Татковината!“

„Бугарија ни недостасува – раскажува за „24 часа“ Марија Самичкова, која со години живее таму и е меѓу иницијаторите. – Најмногу нашите обичаи, култура и традиции, особено кога живееш во град како Лас Вегас – Градот на коцкањето. Тој не спие, тука сè се случува 24/7. Многу е лесно, кога живееш во овој ритам далеку од родниот крај, мислејќи главно за опстанокот, за преживувањето, да се лизнеш и да паднеш во „матрицата“. Во неа човекот ги заборава своите корени и сè она што нè прави Бугари. Затоа по пандемијата овој фестивал ни стана традиција и го организираме четврта година по ред, затоа што имаме потреба да се поврземе со нашите корени, обичаи и култура. Сакаме да ја сочуваме меморијата на нашата историја, традициите, да ги негуваме и да ги пренесуваме на следните генерации – на нашите деца.“

Според неа, Бугарите во Лас Вегас се меѓу најактивните во САД, можеби токму затоа што им недостасува допир со бугарската култура.

Целиот напис прочитајте го во бугарскиот дневен весник 24 часа.