Бугарската академија на науките ја одбележа 156-та годишнина од своето основање
Со свечено собрание во Софија, Бугарската академија на науките (БАН) ја прослави 156-та годишнина од своето основање. Настанот се одржа во салата „Марин Дринов“, која беше исполнета до последното место, јавува БНР.
Свеченоста беше посветена и на уште една значајна годишнина — 155 години од создавањето на „Периодическо списание“ (1870 г.), првото научно издание во современа Бугарија, кое и денес излегува под покровителство на Академијата.
Претседателката на БАН, Евелина Славчева, им се обрати на присутните со зборовите:
„Честит празник! Да живее Бугарската академија на науките! Да живее Бугарија!“
На свеченоста присуствуваа поранешниот претседател на Бугарија Георги Прванов (2002–2012), универзитетски професори, пратеници и претставници на академската заедница. Претседателката на Народното собрание Наталија Киселова испрати поздравителен адрес, во кој изрази признание за придонесот на Академијата кон развојот на бугарската наука.
Во своето обраќање, заменик-министерот за образование Николај Витанов истакна дека од своето основање во 1869 година како Бугарско книжовно друштво, Академијата ја брани улогата на стожер на знаењето и двигател на модернизацијата на државата.
Големата награда на БАН за исклучителни достигнувања во науките за животот и високо меѓународно признание беше доделена на проф. Цветелина Танкова – раководител на Катедрата за ендокринологија при Медицинскиот универзитет – Софија и началник на Клиниката за дијабетологија при Универзитетската болница по ендокринологија „Акад. Иван Пенчев“.
