Бугарската фудбалска легенда Љубослав Пенев се прости од својот чичко Димитар Пенев: „Болката е тивка, но длабока“

Бугарската фудбалска легенда Љубослав Пенев собра сили да се прости од својот чичко Димитар Пенев, кој го напушти овој свет на 80-годишна возраст. Љубослав Пенев се бори со напреднат стадиум на рак во германска клиника, јавува БГНЕС. Еве што напиша тој:

„Чичко, денес болката е тивка, но длабока. Загубив човек кој беше мојата потпора, мојот пример и мојата сила низ целиот мој пат.

Ти ќе останеш во историјата на бугарскиот фудбал како големиот фудбалер и тренер Димитар Пенев, кој ѝ го подари на Бугарија нејзиниот најрадосен миг.

За мене, меѓутоа, ти пред сè беше чичко – мудрост, вера и поддршка што секогаш ги носев со себе.

Во овој тежок момент на разделба, болката поради твојата загуба е неизмерна, но ќе продолжам да го чувам твоето име и твоите поуки со чест.

Поклон пред твојот светол спомен.

Почивај во мир, ЧИЧКО!“, напиша Љубослав Пенев на социјалната мрежа Facebook.