Бугарската заменик-министерка за надворешни работи Ташева го прими новиот македонски амбасадор Крум Ефремов

Заменик-министерката за надворешни работи на Бугарија, Иванка Ташева, ги прими копиите од акредитивните писма на новоименуваниот вонреден и ополномоштен амбасадор на Република Северна Македонија во Република Бугарија, Крум Ефремов.

Заменик-министерката Ташева му посака добредојде на амбасадорот Ефремов. Таа го истакна постигнатиот напредок во спроведувањето на Спогодбата меѓу Владата на Република Бугарија и Владата на Република Северна Македонија за подготовка, изградба и експлоатација на прекуграничен железнички тунел, дел од Коридорот VIII, како добар пример и показател за можностите и позитивните резултати кога постои политичка волја.

Заменик-министерката за надворешни работи го нагласи значењето на поврзаноста за економскиот развој на регионот, но и за зајакнувањето на врските меѓу луѓето од двете страни на границата. Таа истакна дека токму тие се нашиот најголем капитал, но дека за нивното градење се неопходни искрен дијалог и почитување, без провокации и говор на омраза.

Од бугарска страна беше потврдена конструктивната поддршка за европската интеграција на Република Северна Македонија, која подразбира целосно исполнување на обврските од Договорот од 2017 година и Европскиот консензус од 2022 година.

Амбасадорот Ефремов ја изрази својата желба за развој на билатералните односи преку водење конструктивен дијалог и продлабочување на секторската соработка, вклучително и во трговијата, туризмот, инфраструктурата и други области.

Заменик-министерката Ташева му посака на амбасадорот Ефремов успешен мандат во Бугарија и изрази надеж за постигнување конкретен напредок во сите наведени области.